Mapas emocionais

Cartografías dixitais que recollen as testemuñas da veciñanza.
Lembranzas, desexos, opinións…
Mapas que recollen aquilo que non se ve nin se toca, mais se sinte…

Un mapa non é máis que a representación do xeito de vivir dunha comunidade.

A pegada que foi deixando a Historia, os camiños que se percorreron, os afectos e relacións que se foron creando no tempo.
Cando miramos un mapa miramos un retrato que cambia e se redebuxa co constante fluír das persoas, as historias, as diferencias, os erros, as culturas, as feridas e as ideas que o conforman. Podemos ver a vista de paxaro procesos moi longos e situacións moi concretas. Un mapa pode ser unha ferramenta moi poderosa de análise e cambio social, sobre todo cando o importante non son as rúas, senón as persoas que as percorren e por que o fan.

Existen hoxe, grazas a internet, infinidade de mapas que nos sitúan e nos axudan a non perdernos nun lugar. Nós facemos mapas (emocionais) para perdernos, para percorrer vidas e historias, cruzar muros e paredes, explorar os sons, as vistas e as sensacións que configuran un xeito de ser e estar no mundo. E así rematar por atoparnos, sabendo cal é o camiño que nos levou alí.

Hai infinidade de posibilidades sociais e creativas para poñer en valor un territorio a través dun mapa emocional. E queremos imaxinalas todas.